Landssjúkrahúsið verður stýrt av sjúkrahússtjórn, sum er forstjórin í Sjúkrahúsverkinum og tveir varastjórar.

Sjúkrahússtjórnin
Sjúkrahússtjórnin hevur í felag yvirskipaðu leiðsluna av Landssjúkrahúsinum. Sjúkrahússtjórnin er í útinnan av sínum arbeiði fevnd av galdandi lóggávu, viðtøkum, rundskrivum, v.m. umframt avgerðum hjá Heilsumálaráðnum. Sjúkrahússtjórnin umboðar Landssjúkrahúsið úteftir. Limirnir í sjúkrahússtjórnini hava sínámillum upplýsingarskyldu. Leiðsluavgerðir verða at taka í felag, og so vítt gjørligt í semju. Sjúkrahússtjórin hevur ábyrgd av, at avgerð verður tikin. Sjúkrahússtjórin hevur endaligu ábyrgdina av rakstrinum á sjúkrahúsinum mótvegis Heilsumálaráðnum.

Uppgávur hjá stjórn 

• ábyrgd fyri ráðlegging, raðfesting, íverkseting og samskipan av arbeiðsuppgávunum á sjúkrahúsinum 
• ábyrgd fyri støðugari menning á sjúkrahúsinum, soleiðis at sjúkrahúsið støðugt tillagar seg tørvinum hjá sjúklingunum og broytingunum í  treytunum hjá sjúkrahúsinum 
• ábyrgd fyri gerð av uppskoti til fíggjarætlan
• ábyrgd av at góðkend fíggjarætlan verður hildin
• ábyrgd fyri at hagtøl og leiðslukunning yvir virksemi á sjúkrahúsinum verður fingin til vega
• ábyrgd fyri at sett verða mál fyri sjúkrahúsið innan kanningar-, viðgerðar-, røktar-, endurvenjingar- og fyribyrgingarøkini, umframt fíggjar
  og starvsfólkaligu økini í trá við tey mál og stevnumið, sum verða ásett í Heilsumálaráðnum og samstarv við stovnar við tilknýti til heilsu- og almannaøkið
• Ábyrgd fyri samráðingum við samstarvsstovnar innanlands og uttanlands
• Samábyrgd fyri útinnan av teimum nevndu uppgávunum, tó soleiðis at stjórin hevur endaligu ábyrgdina av, at neyðugu avgerðirnar verða
  tiknar 
• Avgerðarrættin og ábyrgdina av hvussu sjúkrahúsið verður skipað undir sjúkrahússtjórnini, men er tó fevnd av reglum, sum Heilsumálaráðið hevur sett fyri hesum