Rannsóknarstovan er útgjørd við hópin av nýmótans tøkni
|
Rannsóknarstovan er útgjørd við hópin av nýmótans tøkni, og her verða allar kanningar gjørdar, hvørt tað er vætukanningar, beinagrindskanningar, nýrakanningar, vevkanningar, mikrobiologiskar kanning o.s.fr. Tá tú tekur eina blóðroynd, so er tað her, at títt blóð verður kannað.
Ann er deildarleiðari á Rannsóknarstovuni har eini 30 starvsfólk starvast. Tey sita handan leiktjøldini við framkomnum maskinum, sjóneykum og eini kønari hond og gera kanningar av biologiskum tilfari fyri at staðfesta sjúku, so læknar kunnu geva sjúklingum røttu viðgerðina.
Fyri ein óroyndan er hetta ein fremmandur heimur, men hesi duga og vita hvat tey gera. Eini 100 ymiskar biokemiskar analysur kunnu gerast á Rannsóknarstovuni.
Eitt nú hava tey eina stóra maskinu, sum uppá stutta tíð kann eyðmerkja hvat slag av bakterium er í m.a. blóðinum hjá fólki.
Tá læknin fær upplýst bakteriuslagið, veit hann hvat fyri antibiotika sjúklingurin kann viðgerast við.
