Nú verður bíleggingarskipanin á corona.fo latin upp fyri øllum, sum eru 80 ár og eldri. Skipanin hevur víst seg at rigga væl hetta fyrsta samdøgrið.
Í gjár varð nýggja bíleggingarskipanin hjá Sjúkrahúsverkinum tikin í nýtslu, og útvið 250 fólk eldri enn 84 ár hava longu bílagt eina tíð til koppseting. Í flestu førum eru tað avvarðandi, ið hava hjálpt við bíleggingini.
Tað eru áleið 500 tøkir skamtar av koppingarevni eftir í Føroyum í løtuni, og tí metir Sjúkrahúsverkið tað vera rætt at bjóða næsta bólki í koppsetingarætlanini koppseting. Tað eru fólk, sum eru á millum 80 og 84 ár.
Koppsetingarnar verða framdar á teimum trimum sjúkrahúsunum fram til páskir.
Góð ráð, tá tú bíleggur
Her eru nøkur góð ráð, tá fólk bíleggja.
• Hav p-tal og fartelefonina hjá tær, tá ið tú bíleggur tíð.
• Kennir tú teg ikki trygga við tøknina, so mæla vit til, at ein avvarðandi hjálpir tær.
• Til ber at brúka telefonnummar og teldupost hjá tí avvarðandi, tá ið tú bíleggur tíð.
• Um tit framvegis hava avbjóðingar við at bíleggja tíð, ber til at fáa hjálp við at ringja á 30 45 45
Tá ið tú bíleggur, velur tú fyrst koppsetingarstaðið og so eina tøka tíð í upplatingartíðini.
Sjúkarhúsverkið hevur gjørt ein vegleiðandi film, sum kann hjálpa tær við bíleggingini. Filmurin liggur á síðuni, har bíleggingin fer fram. Sí eisini filmin HER
