Leygardagin vóru tveir smittutilburðir staðfestir á Landssjúkrahúsinum. Talan er um ein innlagdan sjúkling og eitt starvsfólk á Landssjúkrahúsinum, sum eru smittað við koronu. Sjúklingurin er fluttur á koronadeildina og starvsfólkið er farið í sóttarhald.
Starvsfólkadeildin á Landssjúkrahúsinum og Landslæknin eru í tøttum samstarvi um smittusporingina.
Sjúklingarnir sum liggja á raktu deildini vórðu beinanvegin í gjár kannaðir fyri koronu, og øll kanningarúrslitini eru negativ. Sjúklingarnir eru nú fluttir á einastovur í 10 dagar og verða kannaðir aftur annað hvønn dag næstu 10 dagarnar.
Starvsfólkini, sum hava verið í sambandi við tey bæði smittaðu, eru eisini kannaði. Øll úrslitini eru ikki tøk enn, men, tey, sum hava fingið svar, eru negativ. Starvsfólkini eru farin heim í sóttarhald, og verða kannaði aftur annað hvønn dag næstu seks dagarnar.
Taka nýggj stig í Sjúkrahúsverkinum
Fyri at binda um heilan fingur, tekur Sjúkrahúsverkið nú nýggj stig fyri at forða fyri, at koronasmittan kemur inn aftur á sjúkrahúsini. Hesi tiltøk ávirka sjúklingar og avvarðandi. Tiltøkini eru m.a. hesi:
• Latið verður fyribils aftur fyri øllum vitjandi. Eru serligar umstøður, sum tala fyri, at ein sjúklingur fær vitjan, skal hetta avtalast við deildina.
• Allir akuttir sjúklingar skulu brúka masku fyri nøs og munn til negativt COVID-19 svar fyriliggur
• Sjúklingar skulu so vítt gjørligt ikki flytast millum deildir og sjúkrahús
Sjúkrahúsverkið fylgir gongdini neyvt og fer at gera neyðugar tillagingar, so hvørt støðan við koronu broytist.