Hósdagin 9. juni 2022 er altjóða ”Hvat hevur týdning fyri teg” dagur, og heilsustarvsfólk í fleiri enn 49 londum um allan heimin tosa við sjúklingar, brúkarar, búfólk og avvarðandi um júst hendan spurning.
Endamálið er at seta sjúklingin í miðdepilin og at betra um trygd og dygd. Hetta snýr seg um miðvíst at arbeiða fyri, at sjúklingar skulu hava uppliving av, at teir verða tiknir við upp á ráð, at teir kenna seg sum eitt heilt menniskja og ikki sum eina sjúku. Tá sjúklingurin verður tikin við uppá ráð í viðgerðini, kann hetta í stóran mun gera úrslitið betri.
Í Sjúkrahúsverkinum fara vit at leggja dent á dagin við einum tiltaki í forhøllini, har sjúklingar og avvarðandi hava møguleika at svara spurningum við at útfylla eitt postkort ella fáa eitt prát við starvsfólk á staðnum.
Heilsustarvsfólk úti á deildum, ambulatorium osf. fara eisini at leggja dent á spurningin, við at býta postkort út til sjúklingar og avvarðandi, og vónandi eggjar hetta til samrøður um evnið.
Hesin spurningur eigur at vera partur av samskiftinum alt árið, og spurningurin: ”Hvat hevur týdning fyri teg?” skal áhaldandi setast. At halda dagin við árligum tiltaki er fyri at leggja áherðslu og at minna okkum á, hvussu virðismikil hesin spurningur er í samskiftinum millum heilsustarvsfólk og brúkarar av heilsutænastum.
