Á føðideildini eru føðistovur, barsilsstovur og neonatalstova. 
Deildin veitir ljósmøðratænastu, barsil, røkt og sjúkrarøkt, obstetrik og neonatal sum fakøki. 

Tá tú hevur átt
Røktarstarvsfólkið vegleiðir m.a. um bróstageving, røkt og ansing av barninum við atliti til tætt samband millum tykkum og barnið, menning, reinføri og sjúkufyribyrging. 

Les meira um røkt her, umframt faldaran Gott at vita eftir føðing.

Undirvísing
Hvørt kvøld kl. 20.30 verður filmur vístur í uppihaldsstovuni um bróstgevan. Prát og vegleiðing verður eftir tørvi.
Eftirføðingarvenjing hjá fysioterapeuti er mánadag - fríggjadag frá kl. 12.30 til 13.00.

Innleggingar- og útskrivingarsamrøða
Eitt starvsfólk hevur eina innleggingar- og útskrivingarsamrøðu við teg/tykkum.  
Mett verður, í samráð við teg, nær tú og barnið væntandi kunnu fara heim.

Karmar
Føðideildin er staðsett á hædd 2 í A bygninginum, og umfatar 2 føðistovur og 1 familjustovu, har barnakonan er meðan hon hevur verkir og fyrstu tímarnar aftaná burðin.
Harumframt eru tvær 4-songsstovur og fýra 2-songsstovur, soleiðis, at pláss er fyri 12 mammum við børnum og 4 barnakonum. 
Eisini er ein serútgjørd stova har røkt og viðgerð av ov tíðliga føddum børnum og av sjúkum nýføðingum fer fram (kallað neonatalstovan).
Somuleiðis er ein "skiftistova" har foreldur og starvsfólk kunnu skifta og annars røkta børnunum. Her fara eisini barnalæknakanningarnar fram.
Eisini er kanningarúm, har barnakonur verða kannaðar av lækna ella ljósmóður.

Les um ljósmøðraviðtalu og ultraljóðskanning í viðgongutíðini her. 

Faldarar við kunning til barnakonuna og nýggju familjuna, umframt kunning um ov tíðliga føddir ella sjúkir nýføðingar, umframt tilboð um screening av nýføðingum finnast her.